ڈبل شاہ کون تھا؟ اور کیسے اس نے 18 ماہ میں سات ارب روپے کمائے

سید سبط الحسن عرف ڈبل شاہ کا شمار پاکستانی تاریخ کے سب سے بڑے فراڈیوں میں ہوتا ہے۔ یہ شخص صرف ڈیڑھ سال میں لوگوں کو رقم دوگنی کرنے کا جھانسہ دے کر سات ارب روپے ہڑپ  کر کے ارب پتی بن گیا۔ اس تحریر میں ہم آپ کو بتائیں گے کہ ڈبل شاہ کون تھا، اس نے ڈیڑھ سال میں سات ارب سے زائد رقم کیسے اکٹھی کی۔ اور پھر اس کا کیا حال ہوا۔

سید سبط الحسن عرف ڈبل شاہ کی کہانی

سید سبط الحسن غریب گھرانے میں پیدا ہوا، ایڑھیاں رگڑ رگڑ کر بی ایس سی اور بی ایڈ کیا اور وزیر آباد کے قریب نظام آباد کے گورنمنٹ ہائی سکول میں سائنس کا استاد بھرتی ہو گیا، غربت زیادہ تھی اور خواب اونچے، وہ نوکری سے اکتا گیا، چھٹی لی اور 2004ءمیں دوبئی چلا گیا، وہ چھ ماہ دوبئی رہا، وہ چھ ماہ بعد وزیر آباد واپس آ گیا۔

وزیر آباد میں اس نے ایک عجیب کام شروع کیا، اس نے ہمسایوں سے رقم مانگی اور یہ رقم پندرہ دن میں دوگنی کر کے واپس کردی، ایک ہمسایہ اس کا پہلا گاہک بنا، یہ ہمسایہ جاوید ماربل کے نام سے ماربل کا کاروبار کرتا تھا، ہمسائے نے رقم دی اور ٹھیک پندرہ دن بعد دوگنی رقم واپس لے لی۔

محلے کے دو لوگ اگلے گاہک بنے، یہ بھی پندرہ دنوں میں دوگنی رقم کے مالک ہو گئے، یہ دو گاہک اس کے پاس پندرہ گاہک لے آئے اور یہ پندرہ گاہک مہینے میں ڈیڑھ سو گاہک ہو گئے، یوں دیکھتے ہی دیکھتے لوگوں کی لائین لگ گئی۔

سید سبط الحسن عرف ڈبل شاہ

لوگ زیورات بیچتے، گاڑی، دکان، مکان اور زمین فروخت کرتے اور رقم اس کے حوالے کر دیتے، وہ یہ رقم دوگنی کر کے واپس کر دیتا، یہ کاروبار شروع میں صرف نظام آباد تک محدود تھا لیکن پھر یہ وزیر آباد، سیالکوٹ اور گوجرانوالہ تک پھیل گیا اور دیکھتے ہی دیکھتے وہ معمولی سکول ماسٹر ارب پتی ہو گیا۔

یہ کاروبارصرف 18 ماہ جاری رہا، اس نے ان 18 مہینوں میں 43 ہزار لوگوں سے 7 ارب روپے جمع کر لئے، کاروبار پھیل گیا تو اس نے اپنے رشتے داروں کو بھی شامل کر لیا، یہ رشتے دار سمبڑیال، سیالکوٹ، گجرات اور گوجرانوالہ سے رقم جمع کرتے تھے، پانچ فیصد اپنے پاس رکھتے اور باقی رقم اسے دے دیتے۔

ڈبل شاہ  شروع میں پندرہ دنوں میں رقم ڈبل کرتا تھا، بعد ازاں یہ مدت ایک مہینہ ہوئی پھر دو مہینے اور آخر میں 70 دن ہو گئی، یہ سلسلہ چلتا رہا لیکن پھر اس کے برے دن شروع ہوگئے، وہ خفیہ اداروں کی نظر میں آ گیا، تحقیقات شروع ہوئیں تو پتہ چلا وہ ”پونزی سکیم“ چلا رہا ہے۔

پونزی مالیاتی فراڈ کی ایک قسم ہوتی ہے جس میں رقم دینے والا گاہکوں کو ان کی اصل رقم سے منافع لوٹاتا رہتا ہے، شروع کے گاہکوں کو دوگنی رقم مل جاتی ہے لیکن آخری گاہک سارے سرمائے سے محروم ہو جاتے ہیں۔یہ شخص بھی اپنے گاہکوں کے ساتھ پونزی کر رہا تھا، یہ لوگوں کو لالچ دے کر لوٹ رہا تھا۔

یہ بھی پڑھیے : بٹ کوائن کیا ہے، بٹ کوائن ڈیجیٹل کرنسی یا پونزی مالیاتی فراڈ

خفیہ اداروں نے اس کے گرد گھیرا تنگ کر دیا، اس دوران ”ڈیلی نیشن“ میں اس کے خلاف خبر شائع ہوگئی، گوجرانوالہ ڈویژن میں کہرام برپا ہوا اور یہ اپریل 2007ءمیں گرفتار ہو گیا۔ اس وقت تک سید سبط الحسن عرف ڈبل شاہ لوگوں سے سات ارب روپے جمع کر چکا تھا۔

ذرائع کے مطابق چھاپہ ٹیم کوکچن ‘الماریوں ‘بستر‘ڈبوں تک سے روپے ملے جن کو باقاعدہ مشینوں کے ساتھ کاؤنٹ کیاگیا ۔چھاپہ مار ٹیم میں عدالتی نمائندہ، اعلی پولیس افسران،حساس ادارے کے اہلکار شامل تھے ۔ڈبل شاہ کی گرفتا ری کے بعدلوگوں کے ایک بڑی تعداد اپنی رقوم ڈوب جانے کے ڈر سے سراپااحتجاج ہو گئ، جس کی وجہ سے علاقہ کئی روزتک میدان جنگ بنارہا۔

عوام کی ایک بڑی تعداد سٹرکوں پرنکل کراحتجاج کے دوران پولیس سے پٹتی رہی ۔ اس کے بعد نیب نے ڈبل شاہ کو اپنی حراست میں لے لیا اب آپ ڈبل شاہ کی چالاکی ملاحظہ کیجئے، یہ 2007ءمیں نیب کے شکنجے میں آ گیا، نیب نے اس کی جائیداد، زمینیں، اکاؤنٹس اور سیف پکڑ لئے، یہ رقم تین ارب روپے بنی اور اس نے یہ تین ارب روپے چپ چاپ نیب کے حوالے کر دیئے۔

ڈبل شاہ کا کیس چلا، اسے یکم جولائی 2012ءکو 14 سال قید کی سزا ہو ئی، جیل کا دن 12 گھنٹے کا ہوتا ہے چنانچہ ڈبل شاہ کے 14 سال عملاً 7 سال تھے، عدالتیں پولیس حراست، حوالات اور مقدمے کے دوران گرفتاری کو بھی سزا سمجھتی ہیں، ڈبل شاہ 13 اپریل 2007ءکو گرفتار ہوا تھا، وہ عدالت کے فیصلے تک پانچ سال قید کاٹ چکا تھا، یہ پانچ سال بھی اس کی مجموعی سزا سے نفی ہو گئے۔

پیچھے رہ گئے دو سال، ڈبل شاہ نے محسوس کیاکہ  چار ارب روپے کے عوض دو سال قید مہنگا سودا نہیں چنانچہ اس نے پلی بارگین کی بجائے سزا قبول کر لی، جیل میں اچھے چال چلن، عید، شب برات اور خون دینے کی وجہ سے بھی قیدیوں کو سزا میں چھوٹ مل جاتی ہے،ڈبل شاہ کو یہ چھوٹ بھی مل گئی چنانچہ وہ عدالتی فیصلے کے 23ماہ بعد جیل سے رہا ہوگیا۔

یہ بھی پڑھیے: ایک ناقابل فرموش واقعہ، غرور کا سر نیچا ہوتا ہے۔

ڈبل شاہ 15مئی 2014ءکوکوٹ لکھپت جیل سے رہا ہوا تو ساتھیوں نے گیٹ پر اس کا استقبال کیا، یہ اسے جلوس کی شکل میں وزیر آباد لے آئے، وزیر آباد میں ڈبل شاہ کی آمد پر آتش بازی کا مظاہرہ ہوا، پاکستانی تاریخ کے سب سے بڑے فراڈیئے کو ہار پہنائے گئے، اس پر پھولوں کی منوں پتیاں برسائی گئیں اور اسے مسجدوں کے لاؤڈسپیکروں کے ذریعے مبارک باد پیش کی گئی۔

ڈبل شاہ ہر لحاظ سے کامیاب ثابت ہوا، وہ سکول ٹیچر تھا، وہ معاشرے کا تیسرے درجے کا شہری تھا، اس نے فراڈ شروع کیا اور 18 ماہ میں سات ارب روپے کا مالک بن گیا، نیب نے اسے گرفتار کر لیا، وہ گرفتار ہو گیا، نیب ایڑی چوٹی کا زور لگانے کے باوجود اس سے چار ارب روپے نہیں نکلوا سکا، سزا ہوئی اور وہ بڑے آرام سے سزا بھگت کر باہر آ گیا۔

ڈبل شاہ نے قید کے دن بھی جیل کے ہسپتال اور سیکنڈ کلاس میں گزارے، اسے جیل میں تمام سہولتیں حاصل تھیں چنانچہ وہ جب رہا ہوا تو وہ مکمل طور پر کلیئر تھا،اس نے اب کسی کو کچھ ادا کرنا تھا اور نہ ہی پولیس اور نیب اسے تنگ کر سکتی تھی، یہ چار ارب روپے اب اس کے تھے، یہ ان کا بلا شرکت غیرے مالک تھا

ایک سابق سکول ٹیچر کےلئے چار ارب روپے کی رقم قارون کے خزانے سے کم نہیں تھی، وہ وزیرآباد سے لاہور شفٹ ہوا اور دنیا بھر کی سہولیات کے ساتھ شاندار زندگی گزارنے لگا لیکن اب آپ اللہ کا نظام بھی ملاحظہ کیجئے، سید سبط الحسن شاہ عرف ڈبل شاہ کو رہائی کے 16 ماہ بعداکتوبر 2015ءمیں لاہور میں ہارٹ اٹیک ہوا، یہ پنجاب انسٹی ٹیوٹ آف کارڈیالوجی لے جایا گیا، اس کی طبیعت تھوڑی سی بحال ہوئی، یہ گھر آیا لیکن پھر یہ 30 اکتوبر 2015ءکو انتقال کر گیا۔

یہ بھی پڑھیے : بغیر سرمائے (پیسوں) کے کاروبار کرنے کے دو آسان طریقے

ڈبل شاہ چار ارب روپے کا مالک ہونے کے باوجود دنیا سے چپ چاپ رخصت ہو گیا، ڈبل شاہ کی ساری بے نامی جائیداد، خفیہ اکاؤنٹس، کیش رقم، فیکٹریاں اور پلازے دنیا میں رہ گئے اور وہ خالی ہاتھ اگلے جہاں چلا گیا، وہ جائیداد، وہ رقم، وہ پلازے اور وہ خفیہ اکاؤنٹس آج کہاں ہیں؟ دنیا کا مال دنیا کے کتے چاٹ گئے۔
یہ کیا ہے؟ یہ ہماری زندگی، ہمارے نہ ختم ہونے والے لالچ اور ہماری لامتناہی حرص کی اصل حقیقت ہے، ہم انسان اپنے گرد لالچ کی وسیع دیوار بناتے ہیں، ہم مال جمع کرتے ہیں، ہم دوسروں کی عمر بھر کی کمائی لوٹتے ہیں اور قارون کی طرح خزانے بناتے ہیں لیکن آخر میں ہم چپ چاپ دنیا سے رخصت ہو جاتے ہیں اور یہ مال دوسروں کے کام آ جاتا ہے،

نورجہاں کا مقبرہ نشئیوں کی پناہ گاہ بن جاتا ہے اور شاہ جہاں کے تاج محل میں انگریزوں کے گھوڑے باندھے جاتے ہیں، ہم انسان ان چیونٹیوں سے بھی بدتر ہیں جو عمر بھر اپنے جثے سے بڑے دانے کھینچتی رہتی ہیں، انہیں کھینچ، دھکیل کر بلوں تک لاتی ہیں اور جب دانوں کا انبار لگ جاتا ہے تو وہ ان کے سرہانے گر کر مر جاتی ہیں اور پھر ان کی عمر بھر کی جمع پونجی چوہوں کا نوالہ بن جاتی ہے، ہم میں سے زیادہ تر لوگ چونٹیاں ہیں۔

ہم لوگ ڈبل شاہ ہوں یا مشتاق رئیسانی ہوں یا پھر ان کے حکمران ہوں ہم سب چیونٹیاں ہیں، سرے محل کس کا تھا اور کیا اس کے مالک کو اس میں رہنا نصیب ہوا؟ آپ المیہ دیکھئے سرے محل سرے میں سڑتا رہا اور اس کا مالک پاکستانی جیلوں میں عبرت ناک زندگی گزارتا رہا۔

میں اکثر حیران ہوتا ہوں، ہم انسان جانتے ہیں ہم خسارے کے سوداگر ہیں لیکن ہم اس کے باوجود خسارے کی فیکٹریاں لگاتے ہیں، اور ان سے مزید خسارا پیدا کرتے ہیں اور عمر بھر خسارا بیچتے اور خریدتے رہتے ہیں، کیوں؟ آخر کیوں؟ ہم انسان آخر ڈبل شاہ جیسی موت کیوں پسند کرتے ہیں، ہم دولت کے انبار میں کیوں دفن ہونا چاہتے ہیں؟آخر کیوں۔

Double Shah kon tha

نوٹ:  اس تحریر سے متعلقہ اگر کوئی چیز آپ کی سمجھ میں نہیں آئی ہے یا آپ مزید معلومات حاصل کرنا چاہتے ہیں تو آپ ہمیں کمنٹس کر سکتے ہیں۔ اور اگر آپ کو یہ تحریر اچھی لگی ہے۔ تو اسے سوشل میڈیا پر ضرور شیئرکریں۔ تاکہ آپ کے دوست احباب کی بھی بہتر طور پر راہنمائی ہو سکے۔

اپنی رائے کا اظہار کریں